Nasnameya Wêjeyê

Mijara wêjeyê mirov e û ew jî bûnewerek e di nava civakê de. Wekî gelek faktoran, wêje jî faktoreke çandî ya ku bingeha civakî pêk tîne ye. Alîkarîya wêjeyê ji bo pêşveçûna sazûmanîya civakî gelekî girîng e. Ji ber ku nirxên civakî û çandî bi saya wêjeyê ji nifşekî xwe digihînin nifşekî din. Ji ber vê yekê jî, ji bo ku valahîyeke çandî pêk neyê û bîra civakî (ya dîrokî/çandî) zindî bimîne, wêje xwedî risteke gelekî girîng û sereke ye. Wê gavê mirov dikare wêjeyê bi awayekî civakî wisa pênase bike; wêje ji bo nûkirin û avakirina civakekê dikare bibe pêngava destpêkê. Heger wêje ew yek be, ku bihêle bîra civakan zindî bimîne, wê demê divê wêjekar jî hay jê hebe ku wêjeya ku ji kana xwe û kanîya xwe xwedî nebe, tu caran nikare li hember wêjeyên civakên din bibe xwedî karakterekî xurt.

Di vê xwedîbûna ji çavkanîyên xwe yên resen de, divê haya wêjekar jê hebe ku wêjeyeke ji nirxên xwe yên ramyarî û estetîkî kedî bûye û derketiye qadeke gerdûnî, dikare di nava civak û neteweyên dîtir de jî bibe amûreke temsîliyeta civak û neteweya xwe.

Sîdar Jîr